كان عندي موبايل قديم مركون بقاله فترة ومكنتش حاطة فيه شريحة، وكنت فاكرة إنه خلاص ملوش أي استخدام.

لكن لما دورت عن طريقة أستفيد منه. اكتشفت إمكانية تشغيل واتساب على جهاز تاني بنفس الحساب من خلال ميزة “الأجهزة المرتبطة”، بدون شريحة أو تسجيل الرقم من جديد.

جربت الطريقة على موبيلى وكانت عملية الربط بسيطة جداً. حيث لم تستغرق أكثر من دقيقتين، وبعدها بدأت المحادثات تظهر على الجهاز الثاني بشكل طبيعي.

تشغيل واتساب على جهاز تاني بنفس الحساب بدون رقم أو شريحة (شرح الأجهزة المرتبطة)

لو انت معاك موبايل قديم ومش بتستخدمه. أو حتى موبايل جديد وعايز تفتح عليه نفس حساب الواتساب بتاعك. فمش هتكون مضضطر انك تشتري خط جديد أو حتى تعمل حساب تاني.

كل اللي هتحتاجه هو ميزة معينه اسمها “الأجهزة المرتبطة” اللي أضافها واتساب. واللي بتسمحلك تستخدم نفس الحساب على أكتر من جهاز في نفس الوقت.

الخاصيه دي بتشتغل إزاي؟

الفكرة ببساطة إن واتساب بيعمل ربط امن بين الموبايل الأساسي والموبايل التاني باستخدام رمز QR. وبمجرد ما تتم عملية الربط دى هتلاقي نفس الحساب اشتغل على الجهازين في نفس الوقت.

وكل الرسائل الجديدة هتوصلك عليهم بشكل طبيعي والميزة دي كمان رسمية من شركه واتساب. يعني مش محتاج تستخدم أي تطبيقات خارجية أو طرق غير مضمونة.

ايه الحجات الى هتحتاج تعملها قبل ما تبدأ؟

قبل ما تعمل الخطوات، لازم تتاكد من:-

• الواتس بتاعك شغال كويس على موبيلك الاساسي ومفهوش مشكله.
• وان الواتس يكون احدث اصدار نزل من الشركه نفسها.
• تتاكد كمان ان الاجهزه الاثنين متصلين بالنت ويكون معاك موبيلك الاساسي عشان تعمل بيه مسح لرمز QR.

أنا كمان أنصح إن الإنترنت يكون مستقر على الجهازين قبل ما تبدأ. لأن ده ساعد في إن عملية الربط تمت بسرعة، والمحادثات ظهرت على الموبايل التاني من غير تأخير.

خطوات تشغيل الواتساب على الموبايل التاني

أنا جربت الطريقة دي على هاتفي Honor X6c بنظام Android 15. وخدت عملية الربط أقل من دقيقتين، وبعدها بدأت المحادثات تظهر تلقائيًا.

• أول خطوة نزل تطبيق واتساب على الموبايل التاني وافتحه.
• بدل ما تضغط على “موافقة ومتابعة” وتدخل رقم الموبايل، اضغط على الثلاث نقاط اللي فوق، وبعدها اختار ربط كجهاز مرافق.
• بعدها هيظهرلك رمز QR Code، وافتح واتساب على الموبايل الأساسي وروح إلى:الثلاث نقاط > الأجهزة المرتبطة > ربط جهاز
• لما الكاميرا تفتح، وجهها ناحية رمز QR اللي ظاهر على الموبايل التاني.
• بعد ما مسحت رمز QR، تم ربط الجهازين مع بعض، وبعد أقل من دقيقتين ظهرت كل المحادثات على الموبايل التاني بشكل طبيعي، وقدرت أستخدم الحساب مباشرة.

بعد عمليه الربط هتعمل ايه بالظبط؟

بعد ما تخلص عملية الربط تقدر تستخدم حساب الواتساب عادي جدا على الموبايلين. وأي رسالة جديدة هتوصلك هتظهر على الجهازين في نفس الوقت.

كمان هتقدر تبعت وتستقبل الرسائل، وتعمل مكالمات صوتية أو فيديو، وتشارك الصور والملفات من أي موبايل فيهم، ومن غير ما تحتاج تركب خط في الموبايل التاني لأنه بقى مرتبط بحسابك بالفعل.

حاجات لاحظتها أثناء استخدام الميزة

في تجربتي، لاحظت إن الرسائل الجديدة كانت بتوصل على الجهازين في نفس الوقت تقريبا، ومفيش أي فرق ملحوظ بين استخدام الواتساب على الموبايل الأساسي أو الموبايل التاني.

كمان بعد ما عملية المزامنة خلصت، ظهرت كل المحادثات القديمة بشكل طبيعي، وقدرت أقرأ الرسائل وأرد عليها من الموبايل التاني من غير ما أحتاج أرجع للموبايل الأساسي.

أكتر حاجة عجبتني إن الموبايل التاني مكانش محتاج شريحة اتصال خالص، وكل اللي احتاجه كان اتصال بالإنترنت.

وبعد يومين من الاستخدام لقيت نفسي برد على الرسائل من أي جهاز فيهم من غير ما أحس بأي فرق.

مميزات عمليه الربط دي ايه؟

• اول حاجه هى انك مش هتحتاج تركب خط تانى وتحطه فى موبيلك القديم.
• كمان مش هتتضطر انك تنقل شريحتك الاساسيه للموبيل القديم.
• كل الدردشه بتكون فيها عمليه تزامن بين الموبيلن بشكل سهل.
• قدر تستخدم الحساب حتى لو الموبايل القديم مفيهوش شريحة اتصال.
• تقدر تبعت صور وملفات وتعمل مكالمات صوتية ومرئية بشكل طبيعي بعد الربط.
• اهم ميزه طبعا وهى الامان لان الطريقه دى امنه تماما لانها من شركه واتس اب نفسها.

عيوب لازم تعرفها قبل استخدام الميزة

• أول عملية مزامنة ممكن تستغرق شوية وقت لو عندك محادثات كتير.
• لازم يكون إصدار واتساب حديث عشان يظهر خيار ربط كجهاز مرافق.
• لو الإنترنت كان بطيء، ممكن أول عملية مزامنة للمحادثات تاخد وقت أطول شوية.

لو لقيت ان خيار” ربط كجهاز مرافق” مش موجوده عندك تعمل ايه؟؟؟

في بعض الناس هتقابل المشكله دى ان الخيار ده مش متاح عندها وبيكون السبب هنا ان اصدار الواتس عندها اصدار قديم، فى الحاله دى كل الى هتعمله انك تحدث التطبيق من جوجل بلاي لو انت اندرويد، ولو انت ايفون هتحدثه من ابل ستور.

ولو بعد التحديث كمان لقيت انه لسه الخيار مش ظاهر، جرب تمسح بيانات تطبيق واتساب على الموبايل التاني أو جرب كمان تقفل التطبيق وتفتحه تاني أو تعيد تثبيته، لأن الحركة دي بتحل المشكلة عند ناس كتير..

سؤال؟؟… هل الطريقه دى امنه تماما؟

من خلال تجربتي، فالميزة دى آمنة لأنها معتمدة رسميا من واتساب، وكل الرسائل والمكالمات محمية بالتشفير التام بين الطرفين، وبالتالي لا يمكن لأي شخص انه يعرف او يشوف محتوى المحادثات أثناء عمليه النقل أو حتى مزامنتها.

معلومات مهمة لازم تعرفها قبل استخدام الميزة

فيه كام حاجة حبيت أعرفها قبل ما أجرب الميزة، ولقيت إنها ممكن تهم أي حد هيستخدمها لأول مرة.

• الموبايل الأساسي مش لازم يفضل جنب الموبايل التاني طول الوقت، لكن لازم يكون الحساب الأساسي لسه شغال على واتساب.
• تقدر تستخدم نفس الحساب على أكتر من جهاز مرتبط، مش على جهاز واحد بس.
• بعد الربط هتقدر تبعت وتستقبل الرسائل وكمان تعمل مكالمات وتشارك الصور والملفات بشكل طبيعي.
• لو حبيت تفصل الموبايل التاني، تقدر تعمل كده في أي وقت من قائمة “الأجهزة المرتبطة”.

رآي الكاتب

لو عندك موبايل تاني وعايز تعرف طريقة تشغيل واتساب على جهاز تاني بنفس الحساب من غير ما تستخدم رقم الموبايل أو تنقل الخط، فميزة ربط الأجهزة باستخدام QR Code تعتبر من أسهل وأفضل الحلول.

الطريقة مبتاخدش غير كام دقيقة، وبعدها هتقدر تستخدم نفس الحساب على أكتر من موبايل بكل سهولة.